حواديت اطفال قبل النوم -حدوتة الكلب روكي - حواديت دينا و لميس - حواديت ماما نونا للاطفال - حواديت اطفال مكتوبه

 حدوتة النهاردة .....( الكلب روكي )  

كان يا ماكان ....كان في زمان ..😊😊..كلب طيب اووي اسمه روكي ......كان روكي محبوب من كل اصحابه الكلاب ...🐕🐕..لانه حنين جدا و دايما بيساعد اي حد منهم لو احتاج مساعده ....🐶🐶 

و كان روكي بيشتغل حارس مزرعة ....بيحمي الطيور و الخرفان اللي فيها من اي ذئب ممكن يأذيهم .....😒😒 و في يوم و هو بيتمشي حوالين سور المزرعة ...🐕🐕

شافوه شوية اولاد اشقياء ....فضلوا يضيقوا روكي و يقربوا منه .....😡😡😡 و هو لانه طيب مش عايز يأذي حد فيهم

 ......اطمن الاولاد اكتر و قربوا منه اكتر و اكتر ......😯😯

و بداوا يحطوا ايدهم علي جسمه و لما حسوا انه طيب و مش هيعملهم حاجه ......😌😌😌 طلعوا حبل و ربطوه في رقبته ....اتفاجئ روكي باللي عملوه و بدأ يهوهو و مش عايز يعض حد فيهم او يخربشه و يأذيه  .....

فضل يحاول يبعدهم عنه لكن الاولاد الاشقياء فضلوا يضحكوا و يتريقوا عليه .....😂😂😂 انهم قدروا يربطوا بالحبل و افتكروا انهم بكدة هما الاقوياء و ان روكي كلب ضعيف ....😩😩

بدأوا الاولاد يجروا و يشدو الحبل و روكي يتشد من رقبته .....😰😰كان بيتألم و مش عارف يعمل ايه .....و الاولاد يجروا اسرع و روكي بيتجر وراهم علي الارض .....😯😯مرحمهوش 

لحد ما الحبل جرح رقبته و اتعور و بقي بينزف .🐕🐕.....و الاولاد عمالين يضحكوا و مش حاسين انه بيتألم و بيتعذب  .....😢😢

و بعد ما الاولاد الاشقياء تعبوا و زهقوا من الجري و اللعب بروكي ...😲😲.سابوه مرمي علي الارض جسمه مليان جروح و بينزف دم .....

بالصدفة و مجموعة كلاب من اصحابه ماشيين شافوه ..😔😔😔.. و لما لاقوا روكي بالحالة دي جريوا عليه بسرعة و شالوه .....و فضلوا يحاولوا لحد ما فكوا الحبل من رقبة روكي .....😡😡

و  وودوه لصاحب المزرعة فعالجه و نظف الجروح و ربطها ......😬😬 و لما صاحب المزرعة سأل روكي انت ليه سكت لهم .....ليه مدافعتش عن نفسك يا روكي ....ليه معضتهمش حتي 😦😦 ....

رد روكي و قاله لانهم اطفال صغيرين محبتش أذي حد فيهم....😏😏😏 لان الغلطة غلطة باباهم و مامتهم .... نسيوا و هما بيربوهم يعلموهم ازاي يعاملوا الحيوان برحمة .....😷😷 و نسيوا يقولولهم اننا زيهم بنحس و بنتألم و بنتوجع ..

و تاني يوم جيه الاولاد الاشقياء عند سور المزرعة و كانوا بيدوروا علي روكي ......😔😔شافهم صاحب المزرعة و كلمهم و فهمهم ان اللي عملوه في روكي دة حرام و ذنب كبير ربنا هيحاسبهم عليه ...😓😓

.حس الاولاد بالندم الشديد .....و طلبوا من صاحب المزرعة انهم يقابلوا روكي.......😖😖 و يعتذروا له و يطلبوا منه يسامحهم و يوعدوه انهم مش هيعملوا كدة تاني ابدا 😨😨😨

و توتة توتة خلصت الحدوتة 

خلوا اولادكم يجاوبوا علي الاسئلة دي علشان تعرفوا مدي استيعابهم للحدوتة 

1- روكي كان كلب ...( طيب -شرير -متوحش )

2- روكي كان بيشتغل ...( حارس عمارة - حارس مزرعة - حارس قصر ) 

3- مين اللي ربط الحبل في رقبة روكي ( صاحب المزرعة - الاولاد الاشقياء - اصحاب روكي ) 

4- مين اللي فك الحبل من رقبة روكي ....( اصحاب روكي - صاحب المزرعة - الاولاد الاشقياء ) 

5-روكي مدافعش عن نفسه ....( لانهم اطفال صغيرين - لانهم كتفوا ايديه و رجليه - لانهم ضربوه بالعصاية )